Ossi est una bidda de sa provìntzia de Tàtari, chi at unas 5700 abitantes.
S'atura dae su mare a 332 m., est assentada in sa parte nord-ovest de sa Sardigna.
Est una terra antiga meda, fata dae un'istrìscia de terra chi si nde pesat dae sa Nurra
e dae su tauladu Tataresu. Est fata dae campedas de rocas de tuvu, chi faghent
coronas a sas baddes, attraersadu dae sos trainos, chi in istiu si che sicant.
Sas làcanas de su territòriu de Ossi, cun sas biddas bighinas, sunt marcadas dae
formatziones naturales: A nord b'est Su Riu Màscari e carchi monte chi la dividit
dae Muros e Fiolinas; Su riu Mannu dae Ìttiri. Baddes minoreddas la dividit dae sas
biddas de Tissi e Ùsini. Sos terrinos de Ossi chi sunt fatos de luzana e de tuvu sunt
prenas de venas de aba bundante, chi agiuant sa sanidade de sos pasculos e su
contivizu de su bestiàmine, e duncas permitint a s'olia e a sa ua de crèschere bene;
in su tempus antigu custas duas prantas fiant sa richesa de sa comunidade de Ossi.